Bar 2

1 ⲁⲩⲱ ⲁⲡϫⲟⲉⲓⲥ ⲧⲁϩⲟ ⲉⲣⲁⲧϥ ⲙⲡⲉϥϣⲁϫⲉ ⲡⲉⲛⲧⲁϥϫⲟⲟϥ ⲉϩⲣⲁⲓ ⲉϫⲱⲛ ⲁⲩⲱ ⲉϫⲛ ⲛⲉⲛⲣⲉϥϯϩⲁⲡ ⲉⲧϯϩⲁⲡ ⲉⲡⲓ︤ⲏ︦ⲗ︥ ⲁⲩⲱ ⲉϫⲛ ⲛⲉⲛⲣⲣⲱⲟⲩ ⲙⲛ ⲛⲉⲛⲁⲣⲭⲱⲛ ⲁⲩⲱ ⲉϫⲙ ⲡⲣⲱⲙⲉ ⲙⲡⲓ︤ⲏ︦ⲗ︥ ⲙⲛ ⲓⲟⲩⲇⲁ 2 ϫⲉ ⲉⲣⲉⲡϫⲟⲉⲓⲥ ⲉⲓⲛⲉ ⲛⲛⲉⲓⲛⲟϭ ⲙⲡⲉⲑⲟⲟⲩ ⲉϫⲱⲛ ⲛⲁⲓ ⲉⲙⲡⲟⲩϣⲱⲡⲉ ϩⲙ ⲡⲕⲁϩ ⲧⲏⲣϥ ⲕⲁⲧⲁ ⲛⲉⲛⲧⲁϥⲁⲁⲩ ϩⲛ ⲑⲓⲏⲙ ⲕⲁⲧⲁ ⲛⲉⲧⲥⲏϩ ⲧⲏⲣⲟⲩ ϩⲙ ⲡⲛⲟⲙⲟⲥ ⲙⲙⲱⲩⲥⲏⲥ 3 ⲉⲧⲣⲉⲡⲣⲱⲙⲉ ⲟⲩⲱⲙ ⲛⲛⲥⲁⲣⲝ ⲙⲡⲉϥϣⲏⲣⲉ ⲁⲩⲱ ⲛⲧⲉⲡⲣⲱⲙⲉ ⲟⲩⲱⲙ ⲛⲧⲥⲁⲣⲝ ⲛⲛⲉϥϣⲉⲉⲣⲉ 4 ⲁⲩⲱ ⲁⲕϯ ⲙⲙⲟⲛ ⲉⲧⲟⲟⲧⲟⲩ ⲛⲛⲉⲣⲱⲟⲩ ⲉⲧⲕⲱⲧⲉ ⲉⲣⲟⲛ ⲉⲩⲛⲟϭⲛⲉϭ ⲁⲩⲱ ⲉⲩⲙⲁ ⲉⲙⲉⲩⲙⲟⲟϣⲉ ⲛϩⲏⲧϥ ϩⲛ ⲛⲗⲁⲟⲥ ⲧⲏⲣⲟⲩ ⲉⲧⲕⲱⲧⲉ ⲉⲣⲟⲛ ⲛⲁⲓ ⲉⲛⲧⲁⲡϫⲟⲉⲓⲥ ϫⲟⲟⲣⲟⲩ ⲉⲃⲟⲗ ⲛϩⲏⲧⲟⲩ 5 ⲁⲩⲱ ⲁⲛϣⲱⲡⲉ ⲉⲛⲙⲡⲉⲥⲏⲧ ⲉⲛⲧⲛⲛⲧⲡⲉ ⲁⲛ ϫⲉ ⲁⲛⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲙⲡⲛⲥⲱⲧⲙ ⲛⲥⲁ ⲧⲉϥⲥⲙⲏ 6 ⲡϫⲟⲉⲓⲥ ⲡⲉⲛⲛⲟⲩⲧⲉ ⲧⲇⲓⲕⲁⲓⲟⲥⲩⲛⲏ ϣⲟⲟⲡ ⲛⲁⲕ ⲡϣⲓⲡⲉ ⲇⲉ ⲙⲫⲟ ⲉϥϣⲟⲟⲡ ⲛⲁⲛ ⲙⲛ ⲛⲉⲛⲉⲓⲟⲧⲉ ϣⲁ ϩⲣⲁⲓ ⲉⲡⲟⲟⲩ ⲛϩⲟⲟⲩ 7 ⲁⲩⲉⲓ ⲉϩⲣⲁⲓ ⲉϫⲱⲛ ⲛϭⲓ ⲛⲉⲓⲡⲉⲑⲟⲟⲩ ⲧⲭⲣⲟⲩ ϩⲛ ⲛⲉⲛⲧⲁϥϫⲟⲟⲩ ⲛϭⲓ ⲡϫⲟⲉⲓⲥ ⲉϩⲣⲁⲓ ⲉϫⲱⲛ 8 ⲁⲩⲱ ⲙⲡⲛⲥⲟⲡⲥⲡ ⲛⲛⲁϩⲣⲛ ⲫⲟ ⲙⲡϫⲟⲉⲓⲥ ⲡⲉⲛⲛⲟⲩⲧⲉ ⲉⲧⲣⲉⲡⲟⲩⲁ ⲡⲟⲩⲁ ⲙⲙⲟⲛ ⲕⲧⲟϥ ⲉⲃⲟⲗ ϩⲛ ⲙⲙⲉⲉⲩⲉ ⲙⲡⲉϥϩⲏⲧ ⲉⲧϩⲟⲟⲩ 9 ⲁⲡϫⲟⲉⲓⲥ ⲣⲟⲉⲓⲥ ⲉⲣⲟⲛ ⲁϥⲉⲓⲛⲉ ⲉϫⲱⲛ ⲛⲛⲉⲓⲡⲉⲑⲟⲟⲩ ϫⲉ ⲟⲩⲇⲓⲕⲁⲓⲟⲥ ⲡⲉ ⲡϫⲟⲉⲓⲥ ⲉϫⲛ ⲛⲉϥϩⲃⲏⲩⲉ ⲧⲏⲣⲟⲩ ϫⲉ ϩⲛ ⲛⲉⲛⲧⲁϥϩⲱⲛ ⲙⲙⲟⲟⲩ ⲉⲧⲟⲟⲧⲛ 10 ⲙⲡⲛⲥⲱⲧⲙ ⲛⲥⲁ ⲧⲉϥⲥⲙⲏ ⲉⲧⲣⲉⲛⲃⲱⲕ ϩⲣⲁⲓ ϩⲛ ⲛⲉϥⲟⲩⲉϩ ⲥⲁϩⲛⲉ ⲛⲁⲓ ⲉⲛⲧⲁⲡϫⲟⲉⲓⲥ ⲧⲁⲁⲩ ⲙⲡⲉⲛⲙⲧⲟ ⲉⲃⲟⲗ 11 ⲧⲉⲛⲟⲩ ϭⲉ ⲡϫⲟⲉⲓⲥ ⲡⲛⲟⲩⲧⲉ ⲙⲡⲓ︤ⲏ︦ⲗ︥ ⲡⲉⲛⲧⲁϥⲉⲓⲛⲉ ⲙⲡⲉϥⲗⲁⲟⲥ ⲉⲃⲟⲗ ⲙⲡⲕⲁϩ ⲛⲕⲏⲙⲉ ϩⲛ ⲟⲩϭⲓϫ ⲉⲥϫⲟⲟⲣ ϩⲛ ϩⲉⲛⲙⲁⲉⲓⲛ ⲙⲛ ϩⲉⲛϣⲡⲏⲣⲉ ⲙⲛ ϩⲉⲛϭⲟⲙ ϩⲛ ⲟⲩϭⲃⲟⲓ ⲉϥϫⲟⲥⲉ ⲉⲧⲣⲉⲕⲧⲁⲙⲓⲟ ⲛⲁⲕ ⲙⲡⲉⲓⲛⲟϭ ⲛⲣⲁⲛ ϣⲁ ϩⲣⲁⲓ ⲉⲡⲟⲟⲩ ⲛϩⲟⲟⲩ 12 ⲁⲛⲣⲛⲟⲃⲉ ⲁⲛⲁⲥⲉⲃⲉⲓ ⲁⲛϫⲓ ⲛϭⲟⲛⲥ ⲛϩⲏⲧⲕ ⲡϫⲟⲉⲓⲥ ⲡⲉⲛⲛⲟⲩⲧⲉ ⲉϩⲣⲁⲓ ϭⲉ ⲉϫⲛ ⲛⲉⲕⲡⲉⲧⲛⲁⲛⲟⲩϥ ⲧⲏⲣⲟⲩ 13 ⲙⲁⲣⲉϥⲕⲧⲟϥ ⲛϭⲓ ⲡϭⲱⲛⲧ ⲛⲧⲉⲕⲟⲣⲅⲏ ⲉⲃⲟⲗ ⲙⲙⲟⲛ ϫⲉ ⲁⲛϣⲱⲡⲉ ⲉⲛⲥⲟⲃⲕ ϩⲛ ⲛϩⲉⲑⲛⲟⲥ ⲛⲁⲓ ⲉⲛⲧⲁⲕϫⲟⲟⲣⲛ ⲉⲃⲟⲗ ⲛϩⲏⲧⲟⲩ 14 ⲥⲱⲧⲙ ⲡϫⲟⲉⲓⲥ ⲉⲡⲉⲛϣⲗⲏⲗ ⲛⲅϯ ϩⲧⲏⲕ ⲉⲡⲉⲛϩⲣⲟⲟⲩ ⲙⲡⲉⲛⲥⲟⲡⲥ ⲛⲅⲛⲁϩⲙⲛ ⲉⲧⲃⲏⲧⲕ ⲛⲅϯ ⲛⲁⲛ ⲛⲟⲩⲭⲁⲣⲓⲥ ⲙⲡⲉⲙⲧⲟ ⲉⲃⲟⲗ ⲛⲛⲉⲛⲧⲁⲩⲡⲱⲱⲛⲉ ⲙⲙⲟⲛ ⲉⲃⲟⲗ 15 ϫⲉ ⲉⲣⲉⲡⲕⲁϩ ⲧⲏⲣϥ ⲉⲓⲙⲉ ϫⲉ ⲛⲧⲟⲕ ⲡⲉ ⲡϫⲟⲉⲓⲥ ⲡⲉⲛⲛⲟⲩⲧⲉ ϫⲉ ⲡⲉⲕⲣⲁⲛ ⲁⲕⲧⲁⲩⲟϥ ⲉϩⲣⲁⲓ ⲉϫⲙ ⲡⲓ︤ⲏ︦ⲗ︥ ⲁⲩⲱ ⲉϩⲣⲁⲓ ⲉϫⲛ ⲡⲉϥⲅⲉⲛⲟⲥ 16 ⲡϫⲟⲉⲓⲥ ϭⲱϣⲧ ⲉⲃⲟⲗ ϩⲙ ⲡⲉⲕⲙⲁ ⲛϣⲱⲡⲉ ⲉⲧⲟⲩⲁⲁⲃ ϯ ϩⲧⲏⲕ ⲉⲣⲟⲛ ⲁⲩⲱ ⲛⲅⲣⲓⲕⲉ ⲙⲡⲉⲕⲙⲁⲁϫⲉ ⲛⲅⲥⲱⲧⲙ ⲉⲣⲟⲛ 17 ⲁⲩⲱⲛ ⲛⲛⲉⲕⲃⲁⲗ ⲛⲅⲛⲁⲩ ϫⲉ ⲛⲉⲛⲧⲁⲩⲙⲟⲩ ⲁⲛ ⲛⲉⲧϩⲛⲁⲙⲛⲧⲉ ⲛⲉⲛⲧⲁⲩϫⲓ ⲙⲡⲉⲩⲡ︤ⲛ︦ⲁ︥ ⲉⲃⲟⲗ ϩⲛ ⲛⲉⲩⲥⲡⲗⲁⲅⲭⲛⲟⲛ ⲛⲉⲧⲛⲁϯⲉⲟⲟⲩ ⲛⲁⲕ ⲏ ⲥⲉϫⲱ ⲛⲛⲇⲓⲕⲁⲓⲱⲙⲁ ⲙⲡϫⲟⲉⲓⲥ 18 ⲁⲗⲗⲁ ⲟⲩⲩⲩⲭⲏ ⲛⲧⲟϥ ⲉⲥⲣⲗⲩⲡⲏ ⲉϩⲣⲁⲓ ⲉϫⲛ ⲧⲉⲕⲙⲛⲧⲛⲟϭ ⲧⲁⲓ ⲉⲧⲙⲟⲟϣⲉ ⲉⲣⲉϫⲱⲥ ⲃⲏϩ ⲉⲡⲉⲥⲏⲧ ⲉⲥⲑⲃⲃⲓⲏⲩ ⲙⲛ ϩⲉⲛⲃⲁⲗ ⲉⲁⲩⲱϫⲛ ⲙⲛ ⲟⲩⲯⲩⲭⲏ ⲉⲧϩⲕⲁⲉⲓⲧ ⲛⲧⲟⲟⲩ ⲛⲉⲧⲛⲁϯ ⲉⲟⲟⲩ ⲛⲁⲕ ⲙⲛ ⲟⲩⲇⲓⲕⲁⲓⲟⲥⲩⲛⲏ ⲡϫⲟⲉⲓⲥ 19 ϫⲉ ϩⲣⲁⲓ ⲁⲛ ⲉϫⲛ ⲛⲇⲓⲕⲁⲓⲱⲙⲁ ⲛⲛⲉⲛⲉⲓⲟⲧⲉ ⲙⲛ ⲛⲁⲛⲉⲛⲉⲣⲱⲟⲩ ⲁⲛⲟⲛ ⲉⲛⲡⲱϩⲧ ⲙⲡⲉⲛⲛⲁ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲛⲛⲟⲩⲧⲉ 20 ϫⲉ ⲁⲕⲁⲙⲁϩⲧⲉ ⲉϫⲱⲛ ⲙⲡⲉⲕϭⲱⲛⲧ ⲙⲛ ⲧⲉⲕⲟⲣⲅⲏ ⲕⲁⲧⲁ ⲑⲉ ⲉⲛⲧⲁⲕϣⲁϫⲉ ϩⲛ ⲧϭⲓϫ ⲛⲛⲉⲕϩⲙϩⲁⲗ ⲛⲉⲡⲣⲟⲫⲏⲧⲏⲥ ⲉⲩϫⲱ ⲙⲙⲟⲥ ϫⲉ 21 ⲧⲁⲓ ⲧⲉ ⲑⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉ ⲕⲱⲗϫ ⲙⲡⲉⲧⲛⲙⲁⲭϩ ⲛⲧⲉⲧⲛⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ ϫⲉ ⲉⲧⲉⲧⲛⲉϩⲙⲟⲟⲥ ϩⲙ ⲡⲉⲧⲛⲕⲁϩ ⲡⲁⲓ ⲉⲛⲧⲁⲓϯ ⲙⲙⲟϥ ⲛⲛⲉⲧⲛⲉⲓⲟⲧⲉ 22 ⲉϣⲱⲡⲉ ⲇⲉ ⲉⲧⲉⲧⲛⲧⲙⲥⲱⲧⲙ ⲉⲧⲉⲥⲙⲏ ⲙⲡϫⲟⲉⲓⲥ ⲉⲧⲉⲧⲛⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ 23 ϯⲛⲁⲉⲓⲣⲉ ⲛϩⲉⲛⲱϫⲛ ϩⲛ ⲙⲡⲟⲗⲓⲥ ⲛⲓⲟⲩⲇⲁ ⲁⲩⲱ ϯⲛⲁϥⲓ ⲉⲃⲟⲗ ⲛⲑⲓⲏⲙ ⲛⲧⲉⲥⲙⲏ ⲙⲡⲟⲩⲛⲟϥ ⲙⲛ ⲧⲉⲥⲙⲏ ⲙⲡⲣⲁϣⲉ ⲧⲉⲥⲙⲏ ⲛⲟⲩⲡⲁ ⲧϣⲉⲗⲉⲉⲧ ⲙⲛ ⲧⲉⲥⲙⲏ ⲛⲟⲩϣⲉⲗⲉⲉⲧ ⲛⲧⲉⲡⲉⲧⲛⲕⲁϩ ⲧⲏⲣϥ ϣⲱⲡⲉ ⲛⲉⲣⲏⲙⲟⲥ ϫⲉ ⲙⲛ ⲛⲉⲧⲟⲩⲏϩ ϩⲣⲁⲓ ⲛϩⲏⲧϥ 24 ⲁⲩⲱ ⲙⲡⲛⲥⲱⲧⲙ ⲛⲥⲁ ⲧⲉⲕⲥⲙⲏ ⲉⲣϩⲱⲃ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲁⲕⲧⲁϩⲟ ⲉⲣⲁⲧⲟⲩ ⲛⲛϣⲁϫⲉ ⲛⲁⲓ ⲉⲛⲧⲁⲕϫⲟⲟⲩ ϩⲛ ⲛϭⲓϫ ⲛⲛⲉⲕϩⲙϩⲁⲗ ⲛⲉⲡⲣⲟⲫⲏⲧⲏⲥ ⲉⲧⲣⲉⲩⲉⲓⲛⲉ ⲉⲃⲟⲗ ⲛⲛⲕⲉⲉⲥ ⲛⲛⲉⲛⲉⲣⲱⲟⲩ ⲙⲛ ⲛⲕⲉⲉⲥ ⲛⲛⲉⲛⲉⲓⲟⲧⲉ ⲉⲃⲟⲗ ϩⲙ ⲡⲉⲩⲙⲁ 25 ⲁⲩⲱ ⲉⲓⲥ ϩⲏⲏⲧⲉ ⲥⲉⲛⲏϫ ϩⲙ ⲡⲕⲁⲩⲙⲁ ⲙⲡⲉϩⲟⲟⲩ ⲁⲩⲱ ϩⲙ ⲡϫⲁϥ ⲛⲧⲉⲩϣⲏ ⲁⲩⲙⲟⲩ ϩⲛ ϩⲉⲛϩⲓⲥⲉ ⲙⲡⲟⲛⲏⲣⲟⲛ ϩⲙ ⲫⲉⲃⲱⲱⲛ ⲙⲛ ⲧⲥⲏϥⲉ ⲛⲑⲉ ⲉⲛⲧⲁⲕⲧⲛⲛⲟⲟⲩⲥⲉ ⲉϫⲱⲛ 26 ⲁⲩⲱ ⲁⲕⲕⲱ ⲙⲡⲉⲛⲏⲓ ⲉⲛⲧⲁⲩⲉⲡⲓⲕⲁⲗⲉⲓ ⲙⲡⲉⲕⲣⲁⲛ ⲉϩⲣⲁⲓ ⲉϫⲱϥ ⲛⲑⲉ ⲙⲡⲟⲟⲩ ⲛϩⲟⲟⲩ ⲉⲧⲃⲉ ⲙⲡⲟⲛⲏⲣⲓⲁ ⲙⲡⲏⲓ ⲙⲡⲓ︤ⲏ︦ⲗ︥ ⲙⲛ ⲡⲏⲓ ⲛⲓⲟⲩⲇⲁ 27 ⲁⲩⲱ ⲁⲕⲉⲓⲣⲉ ⲉϩⲟⲩⲛ ⲉⲣⲟⲛ ⲡϫⲟⲉⲓⲥ ⲡⲉⲛⲛⲟⲩⲧⲉ ⲕⲁⲧⲁ ⲧⲉⲕⲙⲛⲧϩⲁⲕ ϩⲛ ϩⲱⲃ ⲛⲓⲙ ⲕⲁⲧⲁ ⲧⲉⲕⲙⲛⲧϣⲁⲛϩⲧⲏϥ ⲉⲧⲛⲁϣⲱⲥ 28 ⲕⲁⲧⲁ ⲑⲉ ⲉⲛⲧⲁⲕϣⲁϫⲉ ϩⲛ ⲧϭⲓϫ ⲙⲙⲱⲩⲥⲏⲥ ⲡⲉⲕϩⲙϩⲁⲗ ϩⲙ ⲡⲉϩⲟⲟⲩ ⲉⲛⲧⲁⲕϩⲱⲛ ⲉⲧⲟⲟⲧϥ ⲉⲥϩⲁⲓ ⲙⲡⲉⲉⲓⲛⲟⲙⲟⲥ ⲙⲡⲉⲙⲧⲟ ⲉⲃⲟⲗ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲉⲕϫⲱ ⲙⲙⲟⲥ 29 ϫⲉ ⲉⲧⲉⲧⲛⲧⲙⲥⲱⲧⲙ ⲛⲥⲁ ⲧⲁⲥⲙⲏ ⲧⲉⲧⲛⲛⲟϭ ⲙⲙⲛⲧϩⲁϩ ⲛϣⲁϫⲉ ⲉⲧⲛⲁϣⲱⲥ ⲉⲛⲁⲕⲧⲟ ⲙⲙⲟⲥ ⲉⲡⲟⲩⲉ ϩⲛ ⲛϩⲉⲑⲛⲟⲥ ⲛⲁⲓ ⲉϯⲛⲁϫⲟⲟⲣⲟⲩ ⲉⲃⲟⲗ ⲉⲙⲁⲩ 30 ϫⲉ ⲁⲓⲉⲓⲙⲉ ⲁⲛⲟⲕ ϫⲉ ⲛⲥⲉⲛⲁⲥⲱⲧⲙ ⲁⲛ ⲛⲥⲱⲓ ϫⲉ ⲟⲩⲗⲁⲟⲥ ⲛⲛⲁϣⲧ ⲙⲁⲭϩ ⲛⲉ ⲛⲥⲉⲕⲧⲟⲟⲩ ϩⲙ ⲡⲉⲩϩⲏⲧ ⲉⲡⲕⲁϩ ⲉⲛⲧⲁⲩⲡⲟⲟⲛⲟⲩ ⲉⲃⲟⲗ ⲉⲣⲟϥ 31 ⲛⲥⲉⲉⲓⲙⲉ ϫⲉ ⲁⲛⲟⲕ ⲡⲉ ⲡϫⲟⲉⲓⲥ ⲡⲉⲩⲛⲟⲩⲧⲉ ⲁⲩⲱ ϯⲛⲁϯ ⲛⲁⲩ ⲛⲟⲩϩⲏⲧ ⲁⲩⲱ ϩⲉⲛⲙⲁⲁϫⲉ ⲉⲧⲣⲉⲩⲥⲱⲧⲙ 32 ⲛⲥⲉⲥⲙⲟⲩ ⲉⲣⲟⲓ ϩⲙ ⲡⲕⲁϩ ⲉⲛⲧⲁⲩⲡⲟⲟⲛⲟⲩ ⲉⲃⲟⲗ ⲉⲣⲟϥ ⲁⲩⲱ ⲛⲥⲉⲣⲡⲙⲉⲉⲩⲉ ⲙⲡⲁⲣⲁⲛ 33 ⲛⲥⲉⲕⲧⲟ ⲛⲧⲉⲩϫⲓⲥⲉ ⲉⲃⲟⲗ ϩⲙ ⲡⲉⲛϣⲟⲧ ⲁⲩⲱ ⲉⲃⲟⲗ ϩⲛ ⲛⲉⲩϩⲃⲏⲩⲉ ⲧⲏⲣⲟⲩ ⲙⲡⲟⲛⲏⲣⲟⲛ ϫⲉ ⲥⲉⲛⲁⲣⲡⲙⲉⲉⲩⲉ ⲛⲧⲉϩⲓⲏ ⲛⲛⲉⲩⲉⲓⲟⲧⲉ ⲛⲁⲓ ⲉⲛⲧⲁⲩⲣⲛⲟⲃⲉ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ 34 ϫⲉ ϯⲛⲁⲕⲧⲟ ⲙⲙⲟⲟⲩ ⲉⲡⲕⲁϩ ⲡⲉⲛⲧⲁⲓⲱⲣⲕ ⲙⲙⲟϥ ⲛⲛⲉⲩⲉⲓⲟⲧⲉ ⲁⲃⲣⲁϩⲁⲙ ⲙⲛ ⲓⲥⲁⲕ ⲙⲛ ⲓⲁⲕⲱⲃ ⲛⲥⲉⲣϫⲟⲉⲓⲥ ⲉⲣⲟϥ ⲛⲧⲁⲧⲁϣⲟⲟⲩ ⲛⲥⲉⲧⲙϣⲱⲡⲉ ⲉⲩⲥⲟⲃⲕ 35 ⲛⲧⲁⲧⲁϩⲟ ⲛⲁⲩ ⲉⲣⲁⲧⲥ ⲛⲟⲩⲇⲓⲁⲑⲏⲕⲏ ϣⲁ ⲉⲛⲉϩ ⲛⲧⲁϣⲱⲡⲉ ⲛⲁⲩ ⲛⲛⲟⲩⲧⲉ ⲛⲧⲟⲟⲩ ϩⲱⲟⲩ ⲛⲥⲉϣⲱⲡⲉ ⲛⲁⲓ ⲉⲩⲗⲁⲟⲥ ⲁⲩⲱ ⲛϯⲛⲁⲟⲩⲱϩ ⲁⲛ ⲉⲧⲟⲟⲧ ⲉⲡⲱⲛⲉ ⲉⲃⲟⲗ ⲙⲡⲁⲗⲁⲟⲥ ⲡⲓ︤ⲏ︦ⲗ︥ ⲉⲃⲟⲗ ϩⲙ ⲡⲕⲁϩ ⲉⲛⲧⲁⲓϯ ⲙⲙⲟϥ ⲛⲛⲉⲩⲉⲓⲟⲧⲉ